По перипетиите со новопоставениот директор на Струмичкиот културен центар, тој понуди решение со намера да ги надмине негодувањата на струмичките актери, кои со протест го изразија своето незадоволство од неговиот избор за директор. Тој им предложи стручен уметнички директор и три уметнички секторски раководни места за да можат да дојдат токму стручните кадри, кои се искусни и работат во самиот Дом на културата, во секторите како што се за музика, за актерство, за театар. Тој верува дека на овој начин секој ќе се профилира онаму каде што треба.
“Конкурсот е законски, конкурираат луѓе, веројатно перцепцијата била дека директор мора да биде лице од Домот на културата и тука се јавува проблемот. Убеден сум дека низ разговор и дијалог ќе се изнајде решение и Домот на културата во Струмица ќе продолжи со предизвиците“ – изјави по тој повод премиерот Зоран Заев.
На оваа изјава на Заев реагираат и од Иницијативата „Култура или фискултура“ кој инсистираат на избор на најсоодветниот кандидат од уметничката фела.
„Во сите настапи во медиумите и по средбите со министерката Стефоска, ниту еднаш немаме изјавено, ниту побарано за директор на институцијата да биде назначен член на ансамблот или некој од помошниот уметнички кадар. Од каде го добивте тој впечаток? Нашето барање, уште од распишувањето на конкурсот од страна на ресорното Министерство, е да се избере најсоодветниот кандидат! Ставот на иницијативата е да се стави крај на партизацијата во културата, а тоа, нели, беше и Ваша заложба? Или, можеби, повторно е тоа наша искривена перцепција?“.
Тие пред неколку дена ја објавија и документацијата на избраниот кандидат со кои тој формално-правно ги исполнил критериумите од конкурсот.
„Успеавте ли да ја видите документацијата која ја приложил избраниот кандидат на конкурсот? Диплома од Празијада, благодарница за учество на Струмичкиот карневал, уверение за учество на обука за нов Закон за јавни набавки, фотографија со Вас и други претставници на власта! Зарем овие документи се релевантен доказ за назначување на генерален директор на национална институција?“ – додаваат во својата реакција од иницијативата.
