Ехо фестивалот влегува во втората деценија од животниот век и веќе ги најавуваат датумите кога ќе се одржи 11тото издание на ЕХО Фестивалот за планински филм, а тоа се 05 – 09 Октомври 2020, додека комплетната програма и локациите ќе ги дознаете за некој ден.
„Пред нас имавме голем предизвик оваа година да организираме класичен филмски фестивал, кој ќе обезбеди следење на филмската програма на големото платно, причините ги знаете сите, и поради тие исти причини го поместуваме малку порано фестивалот на почетокот од Октомври 2020. Иако годинава поради протоколите нема да може да се дружиме со интернационални или домашни гости во форма на предавања и презентации, сепак ве уверуваме дека имаме супер возбудливи новости и одлична програма која нема да отстапи од курсот на ЕХО и пораката што ја пренесува“ – велат од фестивалот.
Исто така ЕХО – фестивал на планински филм, кон почетокот на овој месец стана член на Меѓународната алијанса за планински филм “IAMF – International Alliance for Mountain Film”.
„На состанокот на Генералното собрание на оваа организација, одржан на 2ри септември 2020та во рамки на 68мото издание на Фестивалот за планински филм во Тренто (Италија) “Trentofilm festival”, членовите на собранието изгласаа позитивно прифаќање на нашиот фестивал како рамноправен член во Алијансата, рамо до рамо со 26 институции од светот – најголеми имиња од светот на планинските фетсивали, посветени на промоцијата, збогатувањето и конзервацијата на планинската кинематографија. Алијансата до овој момент ја сочинуваа 25 фестивали на планински филм и еден планински музеј – кои претставуваа 19 земји од Европа, Азија, Северна и Јужна Америка и Океанија. Од сега помеѓу нив и нашето и Ваше „ЕХО“ – од Македонија. На прифаќањето на нашиот фестивал за член во Меѓународната алијанса за планински филм, гледаме на чин на сериозно вреднување на нашата работа за нашата публика низ годините, со проекции на скоро 400 филмови, организација на повеќе од 50 презентации, издавање на книги и организација на разни други едукативни содржини на тема планини и обработка на широк спектар на теми кои го претставуваат соживотот на човекот со нив. Но секако и на чин – кој дополнително не’ обврзува на уште посилна работа!“ – велат во соопштението.
