Апстракт(но)
Не знам на што се однесува ова
и кој ќе биде заклучокот.
Ниту дали ќе биде текст или песна.
Зборовите имаат ограничен рок на употреба
и неограничен тек на мислата,
а јазикот цврсто е втемелен помеѓу.
Од пенкалото до тефтерот
еден куп приказ(н)и, тези, контрааргументи
и една (за)мисла што чека да излезе на хартија.
Од еден до друг крај,
меѓу букви, редови, зборови,
недовршена слика на штафелај,
нечија сенка или во нечија сенка,
ничија форма, секаде присутна.
Аспекти сме на нечија точка на гледање.
***
Игра на зборови
Се премолчува ли тишината
од која гласно говори вистината?
Се говорат ли гласно зборовите
испишани меѓу редови?
Ќе ти кажам: погледни!
Ми велиш: те слушам.
Си велам, се разбравме.
Или се разминуваме.
Како вкрстени мечувалци.
Како тап молив на хартија.
Секој во својот ринг,
секој свој противник.
Еден куп ликови.
Само една приказна.
Чија е оваа игра на зборови?
***
Почетокот на заминувањата
Септември – гласник на заминувањето
и проповедник на новите почетоци.
Крај на детството,
премолчен со одекот на
училишното ѕвонче.
Испарување на свежината
низ ќумбињата што крчкаат зимници.
Физичко преминување
во друга агрегатна состојба.
Растегнувањето на облаците
секогаш почнува со заминување
на претходниот облик.
Форми во создавање
извајани од стихови и
недосушени бои на платната
чиишто небесни траги ги штитат
од заминување.
***
Долг
Си должам себеси.
Поглед кон езерскиот бран
и турско кафе во чаршијата.
Во име на времето што не заминува.
Како далга и еден куп измислени
етимологии за земање – давање
доаѓање ̶ заминување.
Пермутации. Комбинации.
Помеѓу нив веројатно постоиме.
Раѓањето, постоењето, исчезнувањето.
Помеѓу долгот и враќањето.
***
Љубица Шопова е родена 1985 година, во Скопје. Магистрирала на Економскиот факултет во Скопје на тема од областа на бихејвиористичката економија, што воедно се вбројува во пионерските трудови од таа област. По подолга пауза, повторно се навраќа на пишувањето поезија на еден неформален поетски настан во Старата скопска чаршија во 2015 година. Оттогаш, неколку пати свои стихови чита во рамките на поетските собири „Астални проекции“ и работи на обликувањето на својот поетски израз. Нејзини песни се објавени во изборот песни од иницијативата „100.000 поети за промена“, во списанијата „Современост“ и „АКТ“, во неколку електронски поетски збирки и во арт-панорамата „Допир“.
Во мај, 2019 година учествувала на меѓународниот поетски фестивал „Литературни искри“ во Гостивар, а нејзините песни беа во најтесен избор од десетте најдобри учесници. „Форми во создавање“ е нејзина прва стихозбирка.
