Oтворање на уметничката галерија „Метаноја” и изложбата со наслов „Бев загубен” на Тони Попов, ќе се одржи на 4 декември 2019 година од 19 часот на Максим Горки 19, Скопје. Овој најнов проект на „Метаноја” – галерија „Метаноја” е остварен во соработка со „Балканскиот институт за вера и култура“ и е идејно поврзан со визијата на интеракцијата на културата и верата во општеството, а во што уметноста играла и игра клучна улога. Идејата е галеријата да донесе скромен придонес кон остварувањето на оваа визија и на многу уметници да им даде можност да ја прикажат својата имагинација и да нѐ приближат кон возвишеното.
За изложбата „Бев загубен“
Целта на изложбата „Бев загубен“ е да се истакне вредноста и убавината на предметите кои во нашето секојдневие не ги забележуваме. Заборавени, фрлени, предмети оставени на забот на времето, токму на такви рециклирани материјали се насликани делата на Попов. На дрвото, хартијата и картонот, авторот успева да им вдахне нов живот, создавајќи уметничко дело. Со истакнување на потеклото на секој предмет, останува забележана неговата историска и сентиментална вредност.
Насловот на изложбата е инспириран од познатата химна „Милост Божја чудесна“. Како и во химната каде што загубениот човек целосно трансформиран од Божјата милост се наоѓа себеси, така и овие загубени предмети во допирот со убавината и уметноста се трансформираат во нешто ново, трајно. „Бев загубен“ е изложба составена од 21 слика со фигуративна тематика, а се изработени во акрилна или маслена техника.
Тони Попов е уметник кој твори во повеќе медиуми, но најблиски му се сликарството и поезијата. Роден е во 1975 година во Скопје. По долгогодишното пишување поезија, во 2011 година почнува да се занимава со сликарство како самоук сликар. Неговите талент, вештина и контемплативна креативност се забележани од љубителите на сликарството, но и од уметничките критичари. Досега има реализирано три самостојни изложби, а учествувал во повеќе групни изложби во Македонија и во светот. Покрај сликањето, Попов оджрува теоретски и практични работилници за млади сликари во Осло, Норвешка. Неговите дела досега се продадени во единаесет земји. Живее во Охрид, заедно со својата сопруга и трите деца.
Самостојни изложби:
2019, „Барајќи се себеси“, Монтажна галерија
2018, „Апстрактна поезија“, Јавна соба, Скопје
2015, „Дојди поблизу“, Национален музеј, Охрид, Македонија
Групни изложби:
2018, „Женскиот модел во ликовната уметност“, НУ Завод и Музеј Струмица, Македонија
2017, „Несовршен простор“, НУ Завод и Музеј, Струмица, Македонија
2015, „Паратисима“ Саем на уметност, Торино, Италија
2015, „Звукот на уметноста“, Охрид, Македонија
2013, ИФЕС, Екс ен Прованс, Франција
