Утре, петок 16 март 2018, 19 часот во галеријата „Акантус“ ќе биде отворена изложбата „Париски сигнатури“. Изложба на дела од четиринаесет македонски уметници, реализирани по нивниот престој во Франција и во Уметничката резиденција во Париз – избор направен од Марина Лешкова.
Поводот за оваа изложба, сам по себе е значаен и нуди можност да се обѕирнеме кон минатото кое ќе нé доведе до сегашноста и ќе понуди еден пресек или синтеза на значајни ликовни ракописи со автохтона ликовна исказност. Поставката на изложбата е составена од веќе одржани или тековни уметнички настани на македонските уметници, кои ни даваат можност за миг да ја почувствуваме и апсорбираме париската атмосфера, преку оптичката перцепција која се случила и повторно нé враќа во трезорот на културните богатства на различности и на дијалог со Франција која е доживеана како сопствен мит. Духот на Париз е пренесен во јавноста преку делата на уметниците кои не познаваат граници и кои го врежале своето богатство на неповторливост во времето и просторот – Марина Лешкова
“Многу ме радува оваа изложба. Таа нè потсетува дека пријателските врски помеѓу нашите две земји почиваат врз долга традиција каде што културната и уметничката размена зазема значајно место.“ –Емануел Рембер
